ໃນລະຫວ່າງວັນທີ 31 ເດືອນມີນາ – 02 ເມສາ 2026 ຂະແໜງໂພຊະນາການ ແລະ ພັດທະນາຊຸມຊົນ ໂຄງການປັບປຸງຊີວິດການເປັນຢູ່ ແລະ ການປັບຕົວກັບການປ່ຽນແປງດິນຟ້າອາກາດ (ປຊກ) ໄດ້ຈັດການອົບຮົມຄືນວຽກງານໂພຊະນາການໃຫ້ແກ່ພະນັກງານໂພຊະນາການຂັ້ນເມືອງ ແລະ ຂັ້ນບ້ານ ຂອງ 14 ເມືອງເປົ້າໝາຍ ຢູ່ທີ່ຫ້ອງປະຊຸມສູນຝຶກອົບຮົມສູນກາງສະຫະພັນແມ່ຍິງລາວ ນະຄອນຫຼວງວຽງຈັນ ໂດຍການເປັນປະທານຂອງທ່ານ ບຸນສີ ນັນທະພອນ ຮອງຜູ້ອຳນວຍການໂຄງການ ປຊກ ມີຜູ້ເຂົ້າຮັບການອົບຮົມທັງ 47 ຄົນ (ພະນັກງານໂພຊະນາການຂັ້ນເມືອງ 14 ຄົນ ແລະ ຂັ້ບບ້ານ 33 ຄົນ).
ຈຸດປະສົງຂອງການອົບຮົມແມ່ນເພື່ອທົບທວນຄືນບັນດາກິດຈະກຳໂພຊະນາການ ແລະ ການປ່ຽນແປງພຶດຕິກຳ ຊຶ່ງຈະໄດ້ສຸມໃສ່ການຖອດຖອນບົດຮຽນຂອງການຈັດຕັ້ງປະຕິບັດໃນບ້ານຊຸດທີ I ເພື່ອຮັບປະກັນວ່າທຸກກິດຈະກຳໂພຊະນາການໄດ້ຖືກຈັດຕັ້ງປະຕິບັດຢ່າງມີຄຸນນະພາບ ໂດຍປະຕິບັດຕາມຂັ້ນຕອນ ແລະ ວິທີການທີກຳນົດໄວ້ໃນຄູ່ມືການດຳເນີນງານ ເຊັ່ນ: ຂັ້ນຕອນການຈັດກອງປະຊຸມ ກພຊ, ການອົບຮົມເຈົ້າຂອງຮ້ານຂາຍເຄື່ອງຍ່ອຍກ່ຽວກັບອາຫານຫວ່າງທີ່ມີຄຸນຄ່າທາງໂພຊະນາການ, ສວນຄົວໂພຊະນາການ, ການຮຽນຮູ້ແບບເພື່ອນສອນເພື່ອນຜ່ານສື່, ອາຫານປ່າ, ເຮືອນຮົ່ມ, ການລ້ຽງແບ້ເພື່ອຮີດນົມ, ການຕິດຕາມປະເມີນຜົນ, ແນວທາງການດໍາເນີນງານສໍາລັບບ້ານຊຸດທີ I ແລະອື່ນໆ…
ເນື້ອໃນສຳລັບການອົບຮົມຄັ້ງນີ້ປະກອບດ້ວຍ:
- ສະພາບລວມຂອງກິດຈະກຳໂພຊະນາການ ແລະ ຖອດຖອນບົດຮຽນຈາກການຈັດຕັ້ງປະຕິບັດໃນບ້ານຊຸດທີ I.
- ບັນດາກີດຈະກຳໂພຊະນາການ ແລະ ຈຸດປະສົງຂອງແຕ່ລະກິດຈະກຳ.
- ແນວທາງການດຳເນີນງານສຳລັບບ້ານຊຸດທີ I, ສົນທະນາກ່ຽວກັບການສະໜອງອາຫານຫຼັງຈາກເດືອນມິຖຸນາ 2026.
- ແຜນສິ່ງຈູງໃຈສຳລັບວຽກສວນຄົວໂພຊະນາການ ແລະ ເພື່ອນສອນເພື່ອນຜ່ານສື່, ການໃຫ້ລາງວັນໂທລະສັບມືຖື.
- ການອົບຮົມເຈົ້າຂອງຮ້ານຂາຍເຄື່ອງຍ່ອຍກ່ຽວກັບການຜະບິດຜົງອາຫານ, ອາຫານຫວ່າງທີ່ມີຄຸນຄ່າທາງໂພຊະນາການ ແລະ ສູດອາຫານ, ຜົນກະທົບຂອງອາຫານທີ່ບໍ່ມີປະໂຫຍດ (ເຮັດວຽກເປັນກຸ່ມ).
- ການນຳໃຊ້ອາຫານປ່າເພື່ອກະກຽມຜົງອາຫານສຳລັບແມ່ ແລະ ເດັກນ້ອຍ, ສິ່ງທີ່ນຳໃຊ້ຜະລິດຜົງອາຫານ ເຊັ່ນ: ກຸ້ງ, ໝາກມ່ວງໄຂ່, ຜັກກູດ, ໝາກເໝົ້າ, ນ້ຳເຜິ້ງ…
- ຄູ່ມືລະບົບອາຫານ, ຕົວຢ່າງ: ການນຳໃຊ້ເງິນເພື່ອຊື້ອາຫານທີ່ມີຄຸນຄ່າທາງໂພຊະນາການ(ເງິນຈາກໂຄງການຈ່າຍເງິນແບບມີເງື່ອນໄຂ, ເງິນຈາກ ກຊກ, ເງິນຈາກການຂາຍຜັກ…)
- ກົນໄກການລາຍງານ (ຮູບແບບ, ການຕື່ມຂໍ້ມູນ, ການກວດກາຂໍ້ມູນ, ຕົວຊີ້ວັດ ແລະ ຟອມລາຍງານທັງໝົດ.
- ກະກຽມແຜນວຽກປີ 2026, ແຜນງົບປະມານແຕ່ງອົບຮົມ ກພຊ ແລະ ຄູ່ມືການເຮັດວຽກປະຈຳເດືອນ.
ໃນລະຫວ່າງການອົບຮົມ ສຳມະນາກອນໄດ້ມີການແບ່ງກຸ່ມຄົ້ນຄວ້າ ຕາມຫົວຂໍ້ທີ່ຄູຝຶກກຳນົດໃຫ້ ແລ້ວຕາງໜ້າແຕ່ລະກຸ່ມຂຶ້ນນຳສະເໜີຜົນການຄົ້ນຄວ້າ, ມີການສະແດງບົດບາດສົມມຸດເພື່ອຝຶກຊ້ອມຄວາມເຂົ້າໃຈຕໍ່ກັບຂັ້ນຕອນການຈັດຕັ້ງປະຕິບັດຕາມຄູ່ມືແນະນຳ ໂດຍສະເພາະແມ່ນການຈັດກອງປະຊຸມກຸ່ມໂພຊະນາການຊຸມຊົນ.
ນອກຈາກນັ້ນກໍ່ຍັງໄດ້ໄປຢ້ຽມຢາມສະຖານທີ່ຈິງຄື ຮ້ານຈຳໜ່າຍຜະລິດຕະພັນອາຫານແປຮູບ (ຮ້ານດັກແດ້) ໂດຍສະເພາະແມ່ນການແປຮູບອາຫານຫວ່າງທີ່ມີຄຸນຄ່າທາງໂພຊະນາການ ເພື່ອໃຫ້ສຳມະນາກອນໄດ້ມີແນວຄິດກ່ຽວກັບການສົ່ງເສີມ ແລະ ແນະນຳໃຫ້ແກ່ເຈົ້າຂອງຮ້ານຂາຍເຄື່ອງຍ່ອຍໃນບ້ານເປົ້າໝາຍທີ່ຕົນຮັບຜິດຊອບສາມາດແປຮູບອາຫານຫວ່າງເດື່ອຈຳໜ່າຍໃຫ້ແກ່ຊຸມຊົນໃນບ້ານຂອງເຂົາເຈົ້າ.
ຊຸດອົບຮົມໄດ້ສຳເລັດ ແລະ ປຶດລົງໃນຕອນບ່າຍຂອງວັນທີ 02 ເມສາ 2026 ດ້ວຍຜົນສຳເລັດອັນຈົບງາມ.
